रौतहट, १२ जेठ । नेकपा एमालेले निर्वाचनको मतपरिणाम सार्वजनिक हुनेक्रम अन्तिम चरणमा पुगेको अवस्थामा पनि जित निकाल्नक्रम जारी छ ।
एमालेले पछिल्लो पटक रौतहटको गरुडा नगरपालिकामा प्रमुख जितेको छ ।
रौतहटको गरुडामा प्रमुखमा कन्थमनी प्रसाद कलवार निर्वाचित भएका हुन् । उनले नेकपा एकीकृत समाजवादीका बृज किशोर प्रसाद यादबलाई ३८ मतको मतान्तरले पछि पार्दै मेयर पदमा जित निकालेका हुन् ।
नवनिर्वाचित मेयर कखवारले ४ हजार ५ सय ६४ मत पाउँदा यादबले ४ हजार ५ सय २५ मत पाएका छन् ।
त्यस्तैगरी यस नगरपालिकाको उपमेयरमा कांग्रेसकी उम्मेदवार पुनम कुमारी चौधरीले जसपाकी विन्दु कुमारी देवीलाई २ हजार २ सय २६ मतको मतान्तरले पछि पार्दै उपमेयर पदमा विजयी भएकी हुन् ।
चौधरीले ६ हजार ७ सय ३ मत प्राप्त गर्दा देवीले ४ हजार ४ सय ७७ मत प्राप्त गरिन् । रौतहटमा एमालेले ३ पालिकामा जित निकालेको छ । रौतहट नेकपा एमालेबाट विभाजित नेकपा एकीकृत समाजवादी अध्यक्ष माधव नेपालको गृहजिल्ला समेत हो ।
